Fara í aðalinnihald

Frídagar

Eftir
Frímann sagði:

{mosimage}Þessa dagana erum við svo lukkuleg að ég hef átt frí frá og með miðvikudeginum og stendur það fram á mánudag. Það er nú samt ekki þannig að legið sé með tærnar upp í loft heldur verður jú að hafa eitthvað fyrir stafni þannig að ungviðinu, jafnt sem hinum fullorðnu, fari ekki að leiðast. Þá er farið á kreik og ýmislegt getur þá gerst.

Fríið hófst þó með barna(g)ælum...


Aðfaranótt miðvikudagsins var slegið Söllerödmet í rúmskiptingum þegar frumburðurinn skilaði kvöldmatnum sínum á koddann milli foreldra sinna. Snör og samhent handtökin í haustmyrkri næturinnar sáu til þess að nýtt lín var senn komið á hjóna(leysa)rekkjuna. Fyrsta barna(g)ælan hafði látið sjá sig.

{mosimage}Fyrsti frídagurinn var notaður til að flysja hið úr sér gengna og grámuskulega gólfteppi af svefnherbergisgólfinu. Drjúgur tími fór í að skrapa af límklístrið eftir að filtferningunum, sem mynduðu undirlagið, með hjálp Red Devil sparslspaða og drjúgu magni af hreinisbensíni. Fjórðungshluti svefnherbergisins er nú prýddur hinu ágæta parketi sem undir tappinu bjó.

Við náðum svo í Baldur í leikskólann um þrjú og skelltum okkur í Grísinn (slangur heimamanna yfir Nærumbanen) inn í Jægersborg, þaðan í S-tog til Gentofte og svo upp í leið 176 til IKEA þar sem átti að versla verðlaunin hans Baldurs í Toys 'r us: Gítar. Ekki höfðum við gengið marga metra þegar barna(g)æla númer tvö leit dagsins ljós, þar var það Ásta Lísa sem lét til sín taka.

{mosimage}Þá voru góð ráð dýr! Útlitið var ekki gott, öll föt og kerrupokinn út í hádegismat dagsins og ekkert til skiptanna. En aftur voru slegin met, í þetta sinnið var það Gentoftemet í gangstéttarklæðaflettingum. Innan skamms sat Ásta Lísa í kerrunni á ný, innvafin í peysuna af mömmu sinni og í kerrupokanum á röngunni. Þá var brunað í nærstaddann Rúmfatalagerinn og verslaður á öðru hundraðinu sá skærbleikasti fatapakki í norðanverðri Evrópu. Á svipstundu milli koddarekkanna var Ásta komin í ný föt. Allir voru þá klárir til að byrja að versla.

Það er skemmst frá því að segja að gítarinn var keyptur sem og þessir fínerís Creative hátalarar í "Elko" þannig að nú er sko heldur betur hægt að hlusta á Rás 2 og aðra landa sína í víðóma bassaveislu. Í dag fórum við í Lyngby af gömlum vana og er það ekki í frásögur færandi. En þessa stundina er allt með kyrrum kjörum hér á bæ þar sem heimilisfólkið hefur það huggulegt: Ásta sofnuð, Baldur að horfa á Emil, Hanna týnd í talnaveröld Sudoko en ég sit hér við tölvuna með góðvini mínum Tuborg.

Ummæli

Skrifa ummæli

Vinsælar færslur af þessu bloggi

Í faðmi fjalla og stórbrotinnar náttúru

Eftir
Við erum svo virkilega að njóta okkar hérna á Íslandinu og höfum farið út í náttúruna og hitt vini og vandamenn á förnum vegi. Krakkarnir príluðu með okkur eitt kvöldið upp á Úlfarsfellið sem blasir við út um stofugluggann hjá mömmu og var það hressilegur túr fyrir sál og líkama. Svo er búið að taka túr um uppsveitir Suðurlands og heimsækja Sólheima sem eiga alltaf stóran stað í hjörtum okkar. Hanna fór með krakkana í sveitina til Guðnýar og nutu þau lífsins og náttúrunnar með ferðum með ströndinni á undir rótum Snæfellsjökuls. Og auðvitað varð að kanna stöðuna á toppi jökulsins líka með hjálp snjótroðara og útsýnið var víst stórfenglegt af toppinum þar. Á meðan Hanna og gríslingarnir nutu lífsins í Syðri-Knarrartungu þá fór ég með Lalla, Snorra og Tolla. Svo erum við búin að prófa þó nokkrar sundlaugar og fara í eitt gott brúðkaup úti í guðsgrænni náttúrunni.
Skrifa ummæli
Lesa meira

Laugarvegurinn hjólaður

Eftir
Þessi hugmynd að taka einn góðann hjólatúr fæddist á vormánuðum hjá meistara Lárusi. Og undirbúningurinn og stemmningsuppbyggingin fór á fullt. Ekkert var sparað til í pökkunarlistum, ferðaáætlunum og gögnum um fyrri slíkar ferðir þar sem hægt er að horfa á myndbönd, sjá gps, lesa lýsingar og sjá myndir. Spennan var orðin þónokkur á sunnudeginum 15 júlí þegar ég var að pakka í bakpoka og elda mat fyrir hópinn inn á milli þess að smyrja nesti fyrir ferðina. Mánudagsmorguninn 16. júlí stóðum við Tolli, Lárus og Snorri klárir á BSÍ eins og hinir túristarnir og gerðum okkur klára í rútuna í Landmannalaugar kl 8. Við komum hjólunum okkar fyrir í einni af tveimur smekkfullu rútunum en tjöld ofl sendum við með annarri rútu upp í Þórsmörk. Eftir nokkuð hoss og hopp vorum við upp í hinum stórbrotnu landmannalaugum þar sem var bara frekar mikið um manninn. Hjólin komu nokkuð heil út úr þessu nema að aftari bremsudiskur hjá mér hafði beyglast en það var lagað fljótt og örugglega. Veðrið var...
Skrifa ummæli
Lesa meira

Draumaferðin - komið á áfangastað

Eftir
Jóladagsmorgun 2011 og það er ræs klukkan 4 að morgni eftir örfáar svefnstundirnar. Það er rok og rigning á E47 á leið út á Kastrup flugvöll, en það á eftir að breytast... Fjölskyldan dormar og sefur til skiptis á milli sögubrota frásagnaglaða aðstoðarflugstjórans um ferðalög danskra víkinga suður eftir álfunni. Fróðlegt, en ég vildi nú samt heldur sofa eins og lofað var eftir mat og fríhafnarprang. Það eru svo nokkur viðbrigði að koma í 20 gráðu hitann og hrjóstrugt eldfjallalandslag þar sem regn er greinilega ekki oft á dagskránni. Eftir 45 mínútna rútuferðalag í gegnum landslag sem líkist Reykjanesinu allmikið komum við á áfangastað, Las Playitas ! Við erum rösk að tékka okkur inn og pakka upp og þá er bara að taka út svæðið og skoða það sem í boði er næstu vikuna. Það eru lögð drög að dagskrá næstu daga og heimilisfaðirinn skráir sig til leiks í 25 km fjallahjólatúr næsta dag. Sundlaugin og krakkaklúbburinn tekinn út og allt fær bestu einkunn. Helstu nauðsynjar bornar í hús úr ...
Ein ummæli
Lesa meira