Fara í aðalinnihald

Hva, ekkert að frétta?

Eftir

Ójú jú, þrátt fyrir þránaða uppfærslutíðni frétta úr Danaveldi hefur ýmislegt verið að gerast hér hjá okkur. Laus úr viku viðjum ískápaleysis, sumarbústaðarferð, svíaheimsókn, sumarkoma ofl. Byrjum á sumarbústaðinum....


Í bústað
Eins og áður hefur verið nefnt þá var búið að panta vikudvöl (8-14 apríl) í sumarbústað upp í Dronningmölle í samfloti við Hjört, Dagný og Kolbein Hrafn. Litlu mátti þó muna fáeinum dögum fyrir brottför að úr yrði fýluferð þar sem mislæsi á greiðsludagsetningu gíróseðils hafði kostað okkur pöntunina og redda varð nýjum bústað 1-2 og 3! Það hafðist nú og hægt var að fara að pakka niður á sem allra naumasta hátt og mögulegt var þar sem til stóð að fara með lest og strætóum. Okkur var bjargað sem fyrr af Nelly nágranna. Hún er svo stórkostleg að bjóðast til að keyra okkur upp eftir og hló nú bara þegar hún sá farangurinn okkar. "Hvernig ætluðuð þið svo að komast með þetta í lest?"


Tetrisþjálfun mín kom sér vel þegar ég púslaði töskum, barnavögnum, bílstólum, matarpokum og okkur 5 inn í litlu Toyotuna hennar Nelly. En það hafðist og við vorum bara rúman hálftíma uppeftir en á þeim tíma hafði Ásta Lísa klárað geðvonskulagerinn og annað töskuhjólið náð að nudda sér langleiðina inn beinvef hægri sköflungsins á mér. En við römbuðum á "Lykkehuset" sem leit svona ljómandi huggulega út eins og sjá má af myndinn hér að ofan.

Slyddu drifin skrefin
Þá var kominn tími til að fara í búð og ná í Hjört og Co. Við hittumst við "búðina" og hófum svaðilförina heim með farangurinn og vörurnar þar sem sýnishorn verðurkerfanna dundu á okkur: rok, rigning, slydda, haglél, þrumur o.s.frv. Þetta var ansi langt "korters labb" þar sem við lentum í smá blindgötum og höfðum ekki enn bestað bestu leið eftir leynistígum. En öll komumst við rök og kát í bústaðinn og var hátíðin þar með sett.

Vikan sem leið
Í stuttu máli var þetta mjög skemmtileg vika að velflestu leyti þótt allt færi ekki samkvæmt sólbökuðum væntingum um veður og heilsufar. Ásta Lísa veiktist strax á sunnudegi með hitavellu og magapest. Var hún því innandyra að mestu fram á föstudaginn langa. Veðrið fór nú að sýna á sér betri hliðar á þriðjudeginum en þá bættist ég í hóp veikindapésanna og gat varla borðað neitt af viti alla vikuna með hita og vitleysu. Er það nú tímasetning! Borðaði fyrstu máltíðina af viti í gærkvöldi.

Þetta var nú samt mjög gaman og strákarnir léku sér mikið saman sem og við fullorðna fólkið sem áttum skemmtilegar kvöldstundir með spjalli, gúmmulaði, popppunktum, bíósýningum ofl. Það var í öllu falli ákveðið að þetta yrði svo sannarlega endurtekið að hausti.

Engillinn Nelly kom svo og sótti okkur á föstudeginum og þá var sko góða veðrið komið sem hefur svo haldist um páskana. Dásamlega milt vorveður með fuglasöng og sólskini. Nú er sumarið loksins að detta inn um lúguna hjá okkur!

Ummæli

Skrifa ummæli

Vinsælar færslur af þessu bloggi

Í faðmi fjalla og stórbrotinnar náttúru

Eftir
Við erum svo virkilega að njóta okkar hérna á Íslandinu og höfum farið út í náttúruna og hitt vini og vandamenn á förnum vegi. Krakkarnir príluðu með okkur eitt kvöldið upp á Úlfarsfellið sem blasir við út um stofugluggann hjá mömmu og var það hressilegur túr fyrir sál og líkama. Svo er búið að taka túr um uppsveitir Suðurlands og heimsækja Sólheima sem eiga alltaf stóran stað í hjörtum okkar. Hanna fór með krakkana í sveitina til Guðnýar og nutu þau lífsins og náttúrunnar með ferðum með ströndinni á undir rótum Snæfellsjökuls. Og auðvitað varð að kanna stöðuna á toppi jökulsins líka með hjálp snjótroðara og útsýnið var víst stórfenglegt af toppinum þar. Á meðan Hanna og gríslingarnir nutu lífsins í Syðri-Knarrartungu þá fór ég með Lalla, Snorra og Tolla. Svo erum við búin að prófa þó nokkrar sundlaugar og fara í eitt gott brúðkaup úti í guðsgrænni náttúrunni.
Skrifa ummæli
Lesa meira

Laugarvegurinn hjólaður

Eftir
Þessi hugmynd að taka einn góðann hjólatúr fæddist á vormánuðum hjá meistara Lárusi. Og undirbúningurinn og stemmningsuppbyggingin fór á fullt. Ekkert var sparað til í pökkunarlistum, ferðaáætlunum og gögnum um fyrri slíkar ferðir þar sem hægt er að horfa á myndbönd, sjá gps, lesa lýsingar og sjá myndir. Spennan var orðin þónokkur á sunnudeginum 15 júlí þegar ég var að pakka í bakpoka og elda mat fyrir hópinn inn á milli þess að smyrja nesti fyrir ferðina. Mánudagsmorguninn 16. júlí stóðum við Tolli, Lárus og Snorri klárir á BSÍ eins og hinir túristarnir og gerðum okkur klára í rútuna í Landmannalaugar kl 8. Við komum hjólunum okkar fyrir í einni af tveimur smekkfullu rútunum en tjöld ofl sendum við með annarri rútu upp í Þórsmörk. Eftir nokkuð hoss og hopp vorum við upp í hinum stórbrotnu landmannalaugum þar sem var bara frekar mikið um manninn. Hjólin komu nokkuð heil út úr þessu nema að aftari bremsudiskur hjá mér hafði beyglast en það var lagað fljótt og örugglega. Veðrið var...
Skrifa ummæli
Lesa meira

Draumaferðin - komið á áfangastað

Eftir
Jóladagsmorgun 2011 og það er ræs klukkan 4 að morgni eftir örfáar svefnstundirnar. Það er rok og rigning á E47 á leið út á Kastrup flugvöll, en það á eftir að breytast... Fjölskyldan dormar og sefur til skiptis á milli sögubrota frásagnaglaða aðstoðarflugstjórans um ferðalög danskra víkinga suður eftir álfunni. Fróðlegt, en ég vildi nú samt heldur sofa eins og lofað var eftir mat og fríhafnarprang. Það eru svo nokkur viðbrigði að koma í 20 gráðu hitann og hrjóstrugt eldfjallalandslag þar sem regn er greinilega ekki oft á dagskránni. Eftir 45 mínútna rútuferðalag í gegnum landslag sem líkist Reykjanesinu allmikið komum við á áfangastað, Las Playitas ! Við erum rösk að tékka okkur inn og pakka upp og þá er bara að taka út svæðið og skoða það sem í boði er næstu vikuna. Það eru lögð drög að dagskrá næstu daga og heimilisfaðirinn skráir sig til leiks í 25 km fjallahjólatúr næsta dag. Sundlaugin og krakkaklúbburinn tekinn út og allt fær bestu einkunn. Helstu nauðsynjar bornar í hús úr ...
Ein ummæli
Lesa meira