Fara í aðalinnihald

Árshátíð

Snillingarnir náðu að sjálfsögðu að velta sleðanum
Um síðastliðna helgi var haldin árshátíð vinnustaðar míns, Mens Mentis. Þetta var dásamlega vel heppnað og skemmtilegt í alla staði. Þeir sem það kusu og höfðu svigrúm til fóru uppeftir á Hótel Skóga strax á föstudagskvöldinu, fóru í pottinn, gufuna, slökuðu á og tóku upp á mis snilldarlegum samkvæmisleikjum eftir því sem mér skildist.

Við Hanna fórum hins vegar af stað á laugardagsmorgninum til að ná í tæka tíð á Byggðasafnið að Skógum þar sem fyrsta formlega samkoman var skipulögð. Súpa og brauð til að fylla magann, óendanlegur fjöldi merkilegra hluta úr fortíðinni á safninu til að metta hugann. Þetta er a.m.k. tveggja daga yfirferð ef vel á að vera. Þórður sjálfur kom og hreif alla vægast sagt með sér, enda mikill hvirfilbylur þar á ferð.

Svo var brunað upp á Mýrdalsjökul í bongó blíðu í vélsleðaferð. Útsýnið var stórfenglegt og þetta var frábær stund þarna uppi í frostinu. Að sjálfsögðu náðum við Hanna þeim merka árangri að velta vélsleðanum með þeim afleiðingum að hann vildi ekki aftur í gang. Eftir drykklanga stund af rykkingum og öðrum tilheyrandi lífgunartilraunum hrökk kvikindið í gang.

Þá lá alveg beinast við að skella sér í pott og gufu fyrir matinn. Borðhaldið var mjög skemmtilegt þar sem kokkur af La Primavera (man ekki hvað hún heitir) galdraði fram dásamlegan mat í ótrúlega litlu eldhúsinu með aðstoðarkonu sinni. Fimm stjörnur gef ég þeim dýrindis mat sem við fengum, nammi namm. Inn á milli kom svo hvert snilldaratriðið á fætur öðru þar sem fyrirfram skipaðir hópar starfsmanna skiluðu af sér afrakstri sínum. Í alla staði frábær árshátíð.


Ummæli

Vinsælar færslur af þessu bloggi

Laugavegurinn hjólaður - myndir

Þann 16. júlí hjóluðum við fjórir félagarnir (ég. Lalli, Snorri og Tolli) frá Landmannalaugum til Bása í Þórsmörk, sem í daglegu tali kallast Laugarvegurinn. Þetta var í alla staða eftirminnileg og frábær ferð í góðum félagsskap sem hélt vel í þá 14 tíma sem við hjóluðum, teymdum upp brekkur, ísskafla og ár. Ferðalokin í Básum klukkan fjögur um nótt voru kærkomin með Thai hnetusmjörskjúklingarétti og mikið var gott að leggjast til hvílu í tjöldunum. Meira segja myndir en mörg orð...

Laugarvegurinn hjólaður

Þessi hugmynd að taka einn góðann hjólatúr fæddist á vormánuðum hjá meistara Lárusi. Og undirbúningurinn og stemmningsuppbyggingin fór á fullt. Ekkert var sparað til í pökkunarlistum, ferðaáætlunum og gögnum um fyrri slíkar ferðir þar sem hægt er að horfa á myndbönd, sjá gps, lesa lýsingar og sjá myndir. Spennan var orðin þónokkur á sunnudeginum 15 júlí þegar ég var að pakka í bakpoka og elda mat fyrir hópinn inn á milli þess að smyrja nesti fyrir ferðina. Mánudagsmorguninn 16. júlí stóðum við Tolli, Lárus og Snorri klárir á BSÍ eins og hinir túristarnir og gerðum okkur klára í rútuna í Landmannalaugar kl 8. Við komum hjólunum okkar fyrir í einni af tveimur smekkfullu rútunum en tjöld ofl sendum við með annarri rútu upp í Þórsmörk. Eftir nokkuð hoss og hopp vorum við upp í hinum stórbrotnu landmannalaugum þar sem var bara frekar mikið um manninn. Hjólin komu nokkuð heil út úr þessu nema að aftari bremsudiskur hjá mér hafði beyglast en það var lagað fljótt og örugglega. Veðrið var

Í faðmi fjalla og stórbrotinnar náttúru

Við erum svo virkilega að njóta okkar hérna á Íslandinu og höfum farið út í náttúruna og hitt vini og vandamenn á förnum vegi. Krakkarnir príluðu með okkur eitt kvöldið upp á Úlfarsfellið sem blasir við út um stofugluggann hjá mömmu og var það hressilegur túr fyrir sál og líkama. Svo er búið að taka túr um uppsveitir Suðurlands og heimsækja Sólheima sem eiga alltaf stóran stað í hjörtum okkar. Hanna fór með krakkana í sveitina til Guðnýar og nutu þau lífsins og náttúrunnar með ferðum með ströndinni á undir rótum Snæfellsjökuls. Og auðvitað varð að kanna stöðuna á toppi jökulsins líka með hjálp snjótroðara og útsýnið var víst stórfenglegt af toppinum þar. Á meðan Hanna og gríslingarnir nutu lífsins í Syðri-Knarrartungu þá fór ég með Lalla, Snorra og Tolla. Svo erum við búin að prófa þó nokkrar sundlaugar og fara í eitt gott brúðkaup úti í guðsgrænni náttúrunni.