Druuulluhaliiii, hrópar Baldur Freyr út um svaladyrnar og segir þar með öllum Suðurbrautarbúum til syndanna. Hann gefur Línu Langsokk ekkert eftir í raddstyrk þegar hún hrópaði þetta sama fúkyrði út um dyr hlöðuloftsins. Já rauðhærði tíkarspenagrallarinn er sterkari fyrirmynd en mann hefði nú grunað að óreyndu. Æ fleiri Línufrasar og -tilsvör koma frá unga manninum...
Við erum svo virkilega að njóta okkar hérna á Íslandinu og höfum farið út í náttúruna og hitt vini og vandamenn á förnum vegi. Krakkarnir príluðu með okkur eitt kvöldið upp á Úlfarsfellið sem blasir við út um stofugluggann hjá mömmu og var það hressilegur túr fyrir sál og líkama. Svo er búið að taka túr um uppsveitir Suðurlands og heimsækja Sólheima sem eiga alltaf stóran stað í hjörtum okkar. Hanna fór með krakkana í sveitina til Guðnýar og nutu þau lífsins og náttúrunnar með ferðum með ströndinni á undir rótum Snæfellsjökuls. Og auðvitað varð að kanna stöðuna á toppi jökulsins líka með hjálp snjótroðara og útsýnið var víst stórfenglegt af toppinum þar. Á meðan Hanna og gríslingarnir nutu lífsins í Syðri-Knarrartungu þá fór ég með Lalla, Snorra og Tolla. Svo erum við búin að prófa þó nokkrar sundlaugar og fara í eitt gott brúðkaup úti í guðsgrænni náttúrunni.
Ummæli