Gestir, Helsinki, Dublin

Eftir -
Það er komið að smá samantekt síðustu vikna. Gestastraumur, Dublinferð og Helsinkiferð eru kannski svona efst í huga...


Gestir
Það hafa ýmsir lagt leið sína til Kaupmannahafnar síðustu vikurnar og við verið svo heppin að ná að hitta þau. Bogi og Iða komu í Nóvemberbyrjun og náðum við ansi skemmtilegri kvöldstund á kaffihúsi á Istegade. Bogi kom svo í mat til okkar upp í Sölleröd og átti það nú heldur betur inni síðan hann hjálpaði mér að flytja inn.
Jakob og Oddný voru hérna um síðustu helgi og áttum við stórgóðan dag á laugardaginn í jólatívolíinu.
Þau voru svo vart farin á sunnudeginum þegar Hannes hringdi úr rigningunni niðri í Kaupmannahöfn, með Guðrúnu upp á arminn. Við hittumst í gærkvöldi og fórum út að borða. Halla og Bjössi slógust svo í hópinn og við áttum alveg ljómandi kvöldstund.

Dublin
Dagana 12.-16. Nóvember fór ég til Dublin á námskeið á vegum vinnunnar. Það var ljómandi góð reisa, gagnlegt námskeið, skemmtilegt fólk og ekki síst dásamlegur bjór! Meira um það síðar ásamt myndum.

Helsinki
Í gær var svo gengið frá helgarreisu til Helsinki 8.-11. desember þar sem Hanna og Baldur ætla að fara ásamt Jakob og Oddný að hvetja Önju á Evrópumeistaramótinu í sundi. Hörkuduglegi húsgagnasmiðslærlingurinn var svo kraftmikil um helgina að hún synti sig inn á mótið. Til hamingju með það Anja!

Svo þarf ég endilega að fara að staga í sundskýluna mína. Við komumst að því á laugardaginn að það er fingurstórt gat á hægri rasskinn. Sennilega eftir allar rennibrautarferðirnar með Baldri í Hörsholm sundlauginni um daginn.

Ummæli

Skrifa ummæli

Vinsælar færslur af þessu bloggi

Laugavegurinn hjólaður - myndir

Eftir -
Mynd
Þann 16. júlí hjóluðum við fjórir félagarnir (ég. Lalli, Snorri og Tolli) frá Landmannalaugum til Bása í Þórsmörk, sem í daglegu tali kallast Laugarvegurinn. Þetta var í alla staða eftirminnileg og frábær ferð í góðum félagsskap sem hélt vel í þá 14 tíma sem við hjóluðum, teymdum upp brekkur, ísskafla og ár. Ferðalokin í Básum klukkan fjögur um nótt voru kærkomin með Thai hnetusmjörskjúklingarétti og mikið var gott að leggjast til hvílu í tjöldunum. Meira segja myndir en mörg orð...
Lesa meira

Í faðmi fjalla og stórbrotinnar náttúru

Eftir -
Við erum svo virkilega að njóta okkar hérna á Íslandinu og höfum farið út í náttúruna og hitt vini og vandamenn á förnum vegi. Krakkarnir príluðu með okkur eitt kvöldið upp á Úlfarsfellið sem blasir við út um stofugluggann hjá mömmu og var það hressilegur túr fyrir sál og líkama. Svo er búið að taka túr um uppsveitir Suðurlands og heimsækja Sólheima sem eiga alltaf stóran stað í hjörtum okkar. Hanna fór með krakkana í sveitina til Guðnýar og nutu þau lífsins og náttúrunnar með ferðum með ströndinni á undir rótum Snæfellsjökuls. Og auðvitað varð að kanna stöðuna á toppi jökulsins líka með hjálp snjótroðara og útsýnið var víst stórfenglegt af toppinum þar. Á meðan Hanna og gríslingarnir nutu lífsins í Syðri-Knarrartungu þá fór ég með Lalla, Snorra og Tolla. Svo erum við búin að prófa þó nokkrar sundlaugar og fara í eitt gott brúðkaup úti í guðsgrænni náttúrunni.
Lesa meira

Draumaferðin - komið á áfangastað

Eftir -
Jóladagsmorgun 2011 og það er ræs klukkan 4 að morgni eftir örfáar svefnstundirnar. Það er rok og rigning á E47 á leið út á Kastrup flugvöll, en það á eftir að breytast... Fjölskyldan dormar og sefur til skiptis á milli sögubrota frásagnaglaða aðstoðarflugstjórans um ferðalög danskra víkinga suður eftir álfunni. Fróðlegt, en ég vildi nú samt heldur sofa eins og lofað var eftir mat og fríhafnarprang. Það eru svo nokkur viðbrigði að koma í 20 gráðu hitann og hrjóstrugt eldfjallalandslag þar sem regn er greinilega ekki oft á dagskránni. Eftir 45 mínútna rútuferðalag í gegnum landslag sem líkist Reykjanesinu allmikið komum við á áfangastað, Las Playitas ! Við erum rösk að tékka okkur inn og pakka upp og þá er bara að taka út svæðið og skoða það sem í boði er næstu vikuna. Það eru lögð drög að dagskrá næstu daga og heimilisfaðirinn skráir sig til leiks í 25 km fjallahjólatúr næsta dag. Sundlaugin og krakkaklúbburinn tekinn út og allt fær bestu einkunn. Helstu nauðsynjar bornar í hús úr ...
Lesa meira